Frekar fubar furðuheimar Mark II

2007-01-11T13:54:00.001Z

Lén

2006-10-10T20:20:00.000Z

Nú er ég orðinn minn eigin herra. Nánar til tekið lénsherra. Ég tók hið löngu tímabæra skref að fá mér lénið tharfagreinir.com, og hef haft mjög gaman af því að leika mér með það.

Nánari upplýsingar má sjá á nýja blogginu mínu. Endilega tékkiði á því.

Leit

2006-10-09T10:59:00.000Z

Ég er núna formlega í atvinnuleit. Mér þykir miður að þurfa að fara út í slíkt, en það eru víst ekki alltaf jólin.

Mér gengur vel á núverandi vinnustað og yfirmaðurinn er mjög ánægður með mig, en fjárhagsstaðan er það slæm að óvíst er hvort ég get unnið hérna mikið lengur.

Þá er bara vonandi að ég finni aðra sambærilega vinnu. Sem betur fer sýnist mér spurnin eftir njörðum vera sæmilega mikil þessa dagana.

Jákvæðni með fyrirvara

2006-10-06T17:34:00.000Z

Algrímur virðist vera hættur að gera þarfir sínar annars staðar en í kassann. Ég ákvað að líta í eigin barm og passa betur að kassinn sé ávallt hreinn. Mig grunar að hann hafi verið ósáttur við þá aðstöðu stundum. Vonandi náum við að leysa þetta í sameiningu.

Bílastæði

2006-10-03T19:05:00.000Z

Nú ætla ég að kvarta aðeins og fá útrás.

Bílastæðamálin við Hringbrautina geta verið pirrandi. Fyrir framan húsið eru nokkur stæði sem oft eru full. Þar að auki skitnar bíllinn mjög fljótt út vegna þeirrar umferðar sem er við götuna ef hann er látinn standa þar, þannig að mér finnst mun betra að leggja fyrir aftan húsið. Þá vandast málin.

Fyrst lagði ég reglulega í stæði við blokk þar sem alltaf er nóg af stæðum. Ég hef aldrei séð planið fyrir framan þá blokk meira en hálffullt. Engu að síður kom einn daginn maður upp að mér sem sagðist vera formaður húsfélagsins þarna. Hann tjáði mér að fólk hefði verið að kvarta yfir því að ég væri að leggja þarna, þar sem ég ætti ekki heima þarna. Mér fannst bjánalegt

- Í fyrsta lagi að einhver skuli hafa nennt að fylgjast með því hverjir leggja í þessi stæði og hvar þeir eiga heima.

- Í öðru lagi að viðkomandi hafi síðan nennt að kvarta yfir því að einhver sem ekki 'á þetta' stæði væri að leggja þarna.

Ég hefði skilið að þetta væri vandamál ef þetta stæði fylltist einhvern tímann, en svo er alls ekki.

Engu að síður ákvað ég að vera nú vingjarnlegur og samvinnufús og hætti að leggja í þessi stæði. Ég færði mig þess í stað yfir í annað plan hjá annarri blokk. Það plan er minna, en blokkin líka, og ég var ekki þess var að þetta stæði fylltist nokkurn tímann, ekki frekar en hitt.

En nei - einn daginn var komin upp tilkynning í stigaganginn minn þar sem þeim tilmælum var beint til okkar í stigagangnum að við mættum ekki leggja í þessi stæði.

URRRRRRRRRRRRRG

Núna hafði semsé einhver haft fyrir því að setja sig í samband við formann okkar húsfélags til að kvarta. Hversu ömurlega snautt getur fólk verið?

Jæja, ég var samt enn samvinnufús þótt pirraður væri. Undanfarið hef ég því lagt við hliðina á sama bílastæði, við Grandaveg. Þetta gera fleiri líka, hef ég séð.

Sú bóla sprakk þegar annar maður nokkur gaf sig á tal við mig. Sá býr í blokk við hliðina á þeirri blokk sem ég nefndi fyrst. Hann sagði að fólk í þeirri blokk hefði verið að kvarta yfir því að bílum væri lagt þarna í götunni, og að til tals hefði komið að kvarta í borginni. Hann tók það reyndar fram að honum sjálfum væri alveg sama um þetta.

Ég hef tekið þá ákvörðun að ef einhver af þeim sem lætur þetta fara í taugarnar á sér kemur að máli við mig, þá mun ég segja viðkomandi að gefa mér leyfi til að leggja á planinu hjá sinni blokk, ellegar hoppa upp í eigin endaþarm. Djöfulsins rugl.

Partý

2006-10-01T14:45:00.000Z

Það er eilíft partýstand. Innflutningspartý hjá Norninni í gær, sem var mjög skemmtilegt. Engir nágrannar komu til að kvarta yfir hávaða.

Svo á 4chan þriggja ára afmæli í dag. Haldið er upp á það á /b/ með því að hafa partýhatta yfir öllum myndunum sem póstað er.

Sökk

2006-09-28T19:50:00.000Z

Í dag er svartur dagur.

Ég gæti sagt margt um þennan dag, en læt það vera, þar sem Gestapóinn Glúmur sagði það mun betur en ég hefði getað sagt. Ég hvet alla til að lesa hans stórmerka rit.

Ammæli

2006-09-26T23:12:00.000Z

Ég á afmæli í dag og nenni ekki neinu. Reyndar fór ég samt í mótmælagöngu og síðan út að borða. Svo fékk ég blöðrur, bol, og bláa rós. Mjög fínn dagur.

Jæja

2006-09-24T16:14:00.000Z

Þetta fór allt saman mjög vel. Ég held að ég hafi verið sá sem hagaði mér hvað lítt skikkanlegast ... ég fann þörf á því að festa spegil upp úr 4 í nótt og fór að negla í vegg, nágrannanum fyrir neðan mig til takmarkraðar skemmtunar. Vonandi hatar hann mig ekki of mikið.

En að öðru leyti var þetta bara hið fínasta boð, og í alla staði frábært fólk sem var þar. Takk fyrir mig.

OMG

2006-09-23T19:50:00.000Z

Hvað úr hverju kemur fullt, fullt af fólki heim til mín. Það ætlar að drekka áfengi og verða fullt, en ég vona að það hegði sér skikkanlega þrátt fyrir það. Ég læt vita hvernig þetta fer á morgun.

Ég um mér frá mér til mín

2006-09-21T22:37:00.000Z

Ég sá glefsu úr viðtali við pabba Dorritar forsetafrúar í sjónvarpinu um daginn. Hann er merkilegur kall; strangtrúaður gyðingur með mikinn áhuga á gyðinglegum forngripum sem hefur náð mjög langt í viðskiptum án þess að vera menntaður að ráði.

Eitt af því sem hann sagði fór dálítið í mig. Hann sagðist hafa gefið safni nokkru marga gripi, en að það hafi hann gert eingöngu fyrir sjálfan sig. Í kjölfar þess viðraði hann klassíska frjálshyggjuhugmyndafræði þess efnis að mannfólkið væri í eðli sínu eigingjarnt og gerði allt í sína eigin þágu eingöngu. Mér þótti skrýtið að heyra jafn trúaðan mann og hann á víst að vera halda slíku fram, þar sem ein af hugmyndum mínum um trúarbrögð er sú að þau eigi að hjálpa aðhyllendum þeirra að hugsa minna um sjálfan sig, og þvíumlíkt.

Þá fór ég að hugsa. Mér sýnist sem að ofsatrúarkristnir á borð við þá sem sjást á sjónvarpsstöðinni Omega sé gríðarlega sjálfhverft fólk. Hjá því virðist allt snúast um hvað Guð getur gert fyrir það; komið reiðu á fjármál þeirra, hjálpað því að hætta að drekka og dópa, læknað alla kvilla þeirra, og svo framvegis. Það er afskaplega sjaldan sem maður sér rætt um samhjálp eða samkennd þarna, þó að örugglega hugsi margt af þessu fólki um slíkt líka. Ég er einfaldlega að segja að þetta virðist vera 'sölupunkturinn' í þessari gerð kristni: Líf 'viðskiptavinarins' er ömurlegt, og Guð mun breyta því.

Gæti verið að þetta gildi um fleiri trúarbrögð? Það er nokkuð víst að Vísindakirkjan fylgir þessu módeli, en það eru auðvitað ekki trúarbrögð frekar en viskustykkið mitt.

Kannski er ég bara í pirruðu skapi þessa stundina.

Gler

2006-09-19T13:07:00.000Z

Gler leynir á sér. Í dag lenti ég í klukkutímalangri umferðarteppu út af gleri. Allt er nú hægt.

Hellirinn

2006-09-16T15:10:00.000Z

Ég hélt að ég væri ekki að fara að sjá Hellinn.

Þangað til áðan.

Snemmbúnar afmælisgjafir eru æði. Manneskjan sem gaf mér þessa er enn meira æði.

Rokkstjarna: Sprengistjarna

2006-09-14T12:45:00.001Z

Sprengistjarnan sprakk loksins í gærkvöldi. Fræðingar höfðu reiknað út örlög hennar langt fram í tímann, og því kom fátt á óvart. Íslenski fylgihnötturinn rauk aftur út í geim. Hvert hann fer er óvíst enn, en hitt er víst að hann náði að hringsóla ansi lengi.

Já, ég horfði á úrslit Rockstar á bar nokkrum í gærkvöldi. Það var frekar skemmtilegt; ég átti vel von á því að hann Magni 'okkar' yrði látinn fara fyrstur, og var því lítt svekktur þegar það gerðist. Ekki voru allir þó jafn sáttir. Þegar ég gekk áleiðis að baðherbergi eftir að hinum magnaða var vísað á brott heyrði ég fýr nokkurn segja "Þið sökkið öll!" við hin þrjú sem eftir voru þegar þau birtust á skjánum. Gaman að þessu.

Smart DJ

2006-09-11T18:01:00.000Z

Eitt það besta við Amarok eru allar viðbæturnar sem til eru fyrir það. Ein af mínum uppáhalds viðbótum er Smart DJ.

Því miður lenti ég í því að nýjasta útgáfan af Amarok skemmdi fyrir Smart DJ ... það voru gerðar gagnagrunnsbreytingar sem ollu því að Smart DJ ruglaðist alveg í ríminu. Ég ákvað að krukka í kóðanum til að reyna að bæta úr því, og það tókst undir lokin. Ég sendi breytingar mínar til höfundar Smart DJ, sem brást skjótt við og var hinn ánægðasti með að einhver annar skuli vera farinn að vinna í þessu með honum. Nú er ég mjög áhugasamur um að vinna frekar í Smart DJ, enda hef ég upphugsað ýmsar leiðir til að bæta það, þótt það sé gott.

Höfundur Smart DJ er Spanjóli, en samt sem áður eru samskiptin milli okkar greið og skýr. Alnetið er sannarlega dásamlegt fyrirbæri.

Blair

2006-09-08T21:12:00.000Z

Nú er Blair hættur. Ég get ekki sagt að ég hafi séð sérstaklega eftir honum. Mér fannst hann alltaf smeðjulegur og vafasamur. Verst þótti mér þó hvernig hann fylgdi Búsknum eins og tryggur hundur, af engri rökréttri ástæðu. Eins og mér þótti nú gaman þegar Verkamannaflokkurinn vann stórsigur í Bretlandi hér um árið, þá hefur þessi stjórn einfaldlega ekki verið nógu góð hin síðari ár. Kannski að það standi nú til bóta. Það er leitt að sjá svona komið fyrir jafn vandaðri þjóð og Bretar eru.

Nýr blogger

2006-09-06T12:25:00.000Z

Blogger, kerfið sem ég nota til að miðla vísdómsorðum á borð við þessi hér, gengur um þessar mundir undir breytingar.

Það fyrsta sem ég tók eftir er að hægt er að skoða og eyða athugasemdum inni í kerfinu sjálfu, í stað þess að þurfa að fara á síðuna. Þetta er jákvætt í ljósi þess að ég hef undanfarið fengið mikið af leiðinlegum ruslathugasemdum við færslur mínar hér. Ég hef reynt að komast hjá því að fara þá leið að skikka lesendur til að slá inn kóða í hvert sinn sem þeir skrifa athugasemdir, og ég vona að til þess muni ekki koma. Þessi breyting ætti að auðvelda mér að eyða því svínakjöti sem inn berst, en auðvitað vona ég að þetta ömurlega rugl hætti einfaldlega.

Önnur breyting er að ekki þarf lengur að 'publisha' (gefa út?) blogginu í hvert sinn sem maður breytir einhverju í því, og allt virðist almennt séð gerast mun hraðar.

Þriðja og leiðasta breytingin er að íslensku stafirnir í síðunni fóru í hönk, og þurfti ég að laga þá handvirkt. Frekar undarlegt það.

Blogger hefur sína kosti og galla, en ég hef hingað til ekki fundið neitt annað kerfi sem býður upp á jafn mikla og góða stjórn yfir útliti og hegðun bloggsins.

Gott að vita

2006-09-03T05:53:00.000Z

(Hnuplað af Önnu Pönnu)

Tilkynning

2006-08-31T23:28:00.000Z

BAGGALÚTUR ER OPINN AÐ NÝJU!

Piss

2006-08-29T17:55:00.000Z

Ég þori ekki að hleypa Algrími inn í herbergið mitt, af því að hann freistast alltaf til að pissa í rúmið. Það er ekkert sérlega skemmtilegt.

Hvað er eiginlega til ráða?

Kopete

2006-08-26T18:19:00.000Z

Merkilegri er líklega sú frétt að ég uppgötvaði nýlega Kopete, sem er IM forrit sem styður flesta þá fítusa í Gaim sem mér fannst vanta þar. Sér í lagi þykir mér skemmtilegt að geta haft svokölluð personal messages, og séð slík hjá öðrum. Einnig er hægt að sýna með slíkum skilaboðum hvað maður er að hlusta á í áðurnefndu Amarok. Loksins get ég gert allt sem ég vil gera á Linux. Vúhú.

amaroK -> Amarok

2006-08-26T18:06:00.000Z

Vissuð þið að amaroK heitir núna Amarok? Reyndar er ég seinn með þessar fréttir, en betra er seint en aldrei, ekkki satt?

Annars er þetta eitt besta forrit í heimi, hvað sem nafninu líður. Var ég kannski búinn að tilkynna það á þessum vettvangi?

Mig dreymdi

2006-08-24T15:25:00.000Z

... meðal annars í nótt að ég hitti Loga Bergmann Eiðsson. Það fór vel á með okkur, og hann sagði mér til að mynda af konu nokkurri sem málaði sig jafnan blindfull, með skelfilegum afleiðingum. Einnig sýndi hann mér myndasögu sem hann hafði skrifað. Svo vorum við allt í einu komnir á meðal ítalskættaðra mafíósa, og vorum að hjálpa þeim að elda smokkfiskrétt. Einn mafíósanna talaði ekkert nema ítölsku, en sem betur fer kunni Logi hana reiprennandi.

Það var ýmislegt fleira sem fram kom í þessum draumi, en ég man það ekki í smáatriðum.

Hvað í fjáranum þýðir þetta?

2^4

2006-08-21T15:08:00.000Z

Cattell's 16 Factor Test Results

Warmth	\|\|\|\|\|\|\|\|\|\|\|\|\|\|\|\|\|\|	58%
Intellect	\|\|\|\|\|\|\|\|\|\|\|\|\|\|\|\|\|\|\|\|\|\|\|\|\|\|\|\|	90%
Emotional Stability	\|\|\|\|\|\|\|\|\|\|\|\|\|\|\|\|\|\|\|\|\|\|\|\|	78%
Aggressiveness	\|\|\|\|\|\|\|\|\|\|\|\|\|\|\|	42%
Liveliness	\|\|\|\|\|\|	18%
Dutifulness	\|\|\|\|\|\|\|\|\|\|\|\|\|\|\|\|\|\|	58%
Social Assertiveness	\|\|\|\|\|\|\|\|\|\|\|\|\|\|\|	46%
Sensitivity	\|\|\|\|\|\|\|\|\|	30%
Paranoia	\|\|\|\|\|\|\|\|\|	26%
Abstractness	\|\|\|\|\|\|\|\|\|\|\|\|\|\|\|\|\|\|	58%
Introversion	\|\|\|\|\|\|\|\|\|\|\|\|\|\|\|\|\|\|\|\|\|	70%
Anxiety	\|\|\|\|\|\|\|\|\|\|\|\|\|\|\|	42%
Openmindedness	\|\|\|\|\|\|\|\|\|\|\|\|\|\|\|\|\|\|\|\|\|\|\|\|	74%
Independence	\|\|\|\|\|\|\|\|\|\|\|\|\|\|\|\|\|\|\|\|\|	66%
Perfectionism	\|\|\|\|\|\|\|\|\|\|\|\|\|\|\|\|\|\|\|\|\|\|\|\|\|\|\|\|	82%
Tension	\|\|\|\|\|\|\|\|\|\|\|\|	38%

Take Cattell 16 Factor Test (similar to 16pf)
personality tests by similarminds.com

- Stolið frá Tigru, frekar seint samt.

Nei annars ...

2006-08-20T12:40:00.000Z

Eftir að hafa séð flugeldasýninguna verð ég að segja að hún var bara fín. Nýja staðsetningin var vel til fundin - það var alls ekki jafn þröngt um áhorfendur og áður. Sýningin sjálf held ég að hafi verið örlítið styttri en vanalega, en flugeldarnir voru stórir og tilkomumiklir. Varðskipið og bátarnir í kringum það voru líka sniðug viðbót.

Ef ég væri haldinn ragnarsreykásheilkenninu myndi ég á þessum tímapunkti segja að flugeldasýningin hafi örugglega verið skipulögð löngu áður en valdaskipti urðu í ráðhúsinu.

Ekki Norðmenn ... annars konar menn

2006-08-17T17:21:00.000Z

Nóttin var sú ágæt ein ...

áður en Sjálfstæðismenn tóku við völdum aftur hér í Reykjavík og ákváðu að sýna hversu góðir þeir eru í aðhaldinu með því að hætta að setja peninga í menningarviðburði.

Þetta er mín samsæriskenning um ástæðuna fyrir því að Menningarnótt verður snautlegri en vanalega þetta árið.

Koma svo

2006-08-15T18:09:00.000Z

Hjálpið mér, kæru gestir.

Skál(i)

2006-08-13T21:21:00.000Z

Ég skrapp í skála yfir helgina með góðu fólki, og var þar að vonum dálítið skálað. Einnig var spilað á hljóðfæri og sungið, sem og hermt eftir hænum.

Skálverjar voru meira og minna jafnframt Bagglýtingar. Það vefsvæði hefur verið lokað frá í byrjun júní. Til stendur að opna það að nýju í ágúst, sem er einmitt núna. Því miður hefur þó hvergi komið fram hvaða dag í ágúst opnunin verður, og hefur það slæm áhrif á sálarlíf Bagglýtinga, sem eru almennt séð orðnir það óþreyjufullir að við skálverjar tókum til þess ráðs að rita innlegg í náttúruna.

Ef einhverjir úr ritstjórn Baggalúts lesa þessar línur vil ég beina þeim tilmælum til þeirra að þeir opni svæðið sem fyrst, til að forða frekari spjöllum á íslenskri náttúru.

Óvæni

2006-08-10T11:00:00.000Z

Það er pirrandi að ekkert orð er til í íslensku yfir hugtakið 'eitthvað sem er óvænt'. Ég hef því ákveðið að bæta úr því ófremdarástandi. Orðið sem nota skal er óvæni. Það fellur vel að íslensku; í málinu er fyrir orðið ofvæni, og nýja orðið beygist þá eins.

Eini gallinn sem ég sé á þessu orði er að hugsanlega gæti fólk misheyrt það sem tvö orð, það er að segja sem ó, væni. Samhengið ætti þó að geta hjálpað til við að greina þar á milli.

Fap

2006-08-08T16:53:00.000Z

Ég fór í skemmtilega nördalegt teiti á laugardaginn. Til marks um nördaskapinn var þarna spilaður, auk annarra, meistari Tom Lehrer. Einnig fann ég blað þar sem var búið að krota myndir af fígúrum af hinu geysiskemmtilega vefsvæði Homestar Runner.

Það sem mér þótti hins vegar skemmtilegast var að komast að því að gestgjafinn, sem ég hef þekkt um nokkurt skeið, stundar vefsvæðið 4chan. Þetta þótti mér líkleg skýring á því að hann notaðist við hugtakið fap í tali sínu, þar sem ég veit um fá önnur samfélög þar sem þetta orðalag er notað.

Við þetta bætist að ég smitaði nýlega Delphigiz af 4chan-bakteríunni. Ljóst er að ég er farinn að þekkja æði marga sem skoða og jafnvel leggja til efni á þetta mæta vefsvæði. Sökum eðlis umrædds vefsvæðis er þó ekki ljóst hversu jákvæð sú þróun er.

Nei

2006-08-05T14:12:00.000Z

Ég var fenginn til að vera með í Nei-átakinu svokallaða í gær. Fyrir þá sem ekki vita það, þá snýst þetta átak um að vekja umræðu meðal karlmanna um nauðganir, og fá þá til að taka virka afstöðu gegn þessum hryllilega glæp. Ég stóð sumsé í Nei-bol ásamt fleiri ungum hugsjónamönnum á Reykjavíkurflugvelli og dreifði nælum og bæklingum til ókunnugra manna, og ræddi meira að segja við þá líka í sumum tilfellum. Miðað við að ég er ekki manna bestur í samræðum við ókunnuga fannst mér þetta ganga ansi vel. Ég væri alveg til í að endurtaka þetta á næsta ári, svona fyrst að ég er orðinn vanur.

Gibsonapi

2006-08-02T15:17:00.000Z

Einn af þeim DVD-diskum sem ég keypti í Amríkunni var The Passion of the Jew, sem inniheldur nefndan South Park þátt ásamt tveimur öðrum þar sem stólpagrín er gert af trúarbrögðum. Í þessum þætti er ógeðsmynd (e. snuff film) Mels Gibsons, The Passion of the Christ tekin duglega fyrir, og leikstjórinn ástralski er útmálaður sem snarbilaður gyðingahatari og masókisti. Aðalþemað er gífurleg hrifning Cartmans á Melnum, og túlkun hans á téðri mynd í þá veru að í henni felist skilaboð um að gyðingarnir hafi drepið Jesú Krist, og því beri að útrýma þeim.

Allt var þetta mjög fyndið og hnyttið þegar ég sá það, en mér datt tæplega í hug að taka spaug þetta alvarlega, nema að því leyti að það renndi frekari stoðum undir þá skoðun mína að mér þykir Píslarganga Krosslafs einstaklega tilgagnslaus mynd sem veltir sér upp úr ógeði að óþörfu. Ég hef reyndar ekki séð hana, en ég hef lesið bókina, og tel að hún sé ívið skárri. Þar er þó að finna einhvers konar vísi að boðskap innan um viðbjóðinn, og lítið farið út í smáatriði.

Á viðhorfi þessu varð þó breyting þegar ég frétti af nýlegu atviki nokkru. Nú er ég sannfærður um að Mel Gibson er í raun og veru kolklikkaður gyðingahatari.

South Park er augljóslega töluvert dýpri þáttur en mig grunaði, og þótti mér hann þó ágætlega djúpur fyrir.

Kattarfréttir

2006-08-01T14:03:00.000Z

Ég þakka mjög góð viðbrögð við kalli mínu eftir nöfnum á köttinn litla.

Eftir dálitla umhugsun ákvað ég að gefa honum nafnið Algrímur. Það nafn er í ætt við það sem Nornin stakk upp á (Arngrímur), en lítillega breytt til að nördavæða það.

Útskýring fyrir ónörda: Orðið algrími er íslenskun á enska orðinu algorithm, sem er upphaflega komið úr arabísku, eins og algebra. Merking þessa orðs er í grófum dráttum 'uppskrift til að leysa ákveðið vandamál'; með öðrum orðum einhvers konar föst röð aðgerða sem keyra má í tölvu (eða jafnvel í höndunum ef menn nenna), sem leysir vandamál á borð við að raða lista, finna stystu leið milli tveggja hnúta í grafi, eða ákvarða læsileika texta. Algrímur er karlkyngerð útgáfa af því orði, og passar því afbragsvel á karlkyns kött.

Fleiri fréttir:

Loki fékk gistingu hjá frænku Nornarinnar, sem betur fer, þar sem hann var alls ekki sáttur við að þurfa að deila mínu heimili með kettlingi. Hann hvæsti bara og urraði á litla greyið, og var ólundalegur við alla sem reyndu að róa hann, meira að segja Nornina sjálfa.

Algrímur hefur það því ágætt núna - en hann er ekki alveg kassavanur enn, því miður. Hingað til hefur hann:

- Pissað í tösku Önnu Pönnu
- Pissað í rúmið mitt
- Kúkað í rúmið mitt

Þvottavélin hefur ekki við.

Nýr kisi

2006-07-30T18:28:00.000Z

Kettirnir hrannast inn fyrir dyrnar. Í dag kom þessi til mín:

Hann verður líklega hjá mér til frambúðar. Loki urraði og lét sig hverfa þegar hann sá hann, en vonandi venjast þeir hvor öðrum. Loki verður nú heldur ekki hérna endalaust.

Verkefni dagsins og komandi daga verður þá að finna nafn á þann litla. Ég býð því lesendum að koma með uppástungur. Ekki væri verra ef nafnið væri dálítið nördalegt.

Cyber Nations

2006-07-28T23:40:00.000Z

Ég uppgötvaði nýjan netleik í dag; Cyber Nations. Hann virðist vera dálítið byggður á Nation States, sem ég þekki vel, en viðbæturnar eru margar. Þetta gæti verið spennandi - til dæmis eru þarna alls konar samskipti milli landanna, sem er þáttur sem mér finnst vanta dálítið í Nation States.

Það verður fróðlegt að sjá hvernig þetta gengur.

Hérna er landið mitt annars.

Kisa

2006-07-26T21:48:00.000Z

Ég fékk kisu í kvöld. Hún verður hjá mér í smá tíma, þangað til eigandinn verður aftur í stöðu til að hafa hana.

Það er fínt að hafa kisu í láni.

Úbbs

2006-07-24T19:41:00.000Z

Ég gleymdi að borða í vinnunni í dag.

En kosturinn er að Subway máltíðin sem ég var að éta áðan bragðaðist fáránlega vel fyrir vikið.

Búhúhú

2006-07-22T12:36:00.000Z

Kallarnir sem vinna við úrbætur á húsinu sem ég bý í hafa enn ekki skipt um glugga í stofunni. Þar sem ég get ekki sett upp gluggatjöldin aftur fyrr en því verki er lokið, er ég orðinn frekar óþreyjufullur. Þeir eru búnir að skipta um nánast hvern einasta glugga í húsinu fyrir utan þennan. Hvers á maður að gjalda?

Ég verð því að biðja fólk sem mætir í kvöld fyrirfram afsökunnar á því að það má búast við að blindast töluvert af sólarljósi. Kannski ég ætti að kaupa hrúgu af sólgleraugum til að dreifa?

Teiti

2006-07-19T20:29:00.000Z

Í tilefni þess að ég hef snúið til landsins eftir tiltölulega langa fjarveru, og þess að íbúðin mín er núna ekkert svo sérstaklega tóm, hef ég ákveðið að efna til gleðskapar í umræddri íbúð á komandi laugardegi. Mæting er upp úr 20:00 og mun skemmtunin standa yfir fram eftir nóttu, eftir því sem áhuginn endist. Þeim sem þurfa nánari leiðbeiningar eða vilyrði fyrir því að viðkomandi sé heimilt að mæta er bent á netfangið þarfagreinir@gmail.com (með th í stað þ).

Já heyrðu

2006-07-18T15:20:00.000Z

Nú eru víst Ísraelar að bomba Líbana í klessu. Þeir eru líklega þreyttir á að berja á Palestínumönnum. Helsti leiðtogi og leiðarljós hins vestræna heims, Kaninn, hefur líka verið mjög duglegur við að setja fordæmið: Það er allt í lagi að sprengja fólk, svo lengi sem það er Arabar sem tengjast á einhvern óljósan hátt öðrum Aröbum sem 'frömdu hryðjuverk' gegn þér. Enda styður Kaninn þessar sprengjuæfingar Ísraela og segir að þeir hafi fullan rétt á að 'verja sig'. Kaninn hefur líka staðið sig mjög vel í að dæla vopnum og peningum í þessi grey í gegnum árin, og á hin útvalda þjóð Guðs vart minna skilið. Er svo ekki líka kominn tími á að athuga hvort þetta dót virki nú ekki allt saman?

Eins og menn segja á Omega: Guð blessar Ísrael, og alla þá sem blessa Ísrael. Ég blessa því Ísrael í þessu verðuga verkefni þess og bíð eftir blessunarávísun frá Guði í póstinum.

Ammæli

2006-07-16T18:25:00.000Z

Ég fór í síðbúna afmælisveislu í gær. Þar var ókeypis áfengi í boði, en merkilegt nokk fékk ég mér ekki dropa af því. Ég hef áhyggjur af sjálfum mér, þó ég hafi reyndar haft það mér til afsökunnar að ég var í hlutverki ökumanns.

Merkilegt nokk þá þekkti ég tvo gesti í þessu afmæli (fyrir utan þá tvo sem komu með mér í bíl), og hafði ég fyrirfram ekki hugmynd um að þeir tengdust gestgjafanum. Svona er þetta lítið land.

Klaufska

2006-07-14T13:21:00.000Z

Það hlaut að koma að því að ég slasaði mig við heimilisframkvæmdir.

Í gær keypti ég perur til að setja í staðinn fyrir þær tvær (af þremur) sem voru sprungnar í ljósastæðunni í eldhúsinu. Ég skipti um þær báðar vandræðalaust, en þegar ég var að fara niður af stólnum með hina síðari af þeim sprungnu í hendinni, þá byrjuðu vandræðin. Ég datt af stólnum. Á hraðri leið minni niður rakst peran sem ég var með í hendinni í eldhúsborðið. Glerbrotin dreifðust um allt gólf. Ég hafnaði á hnjám og höndum á gólfinu. Í stutta stund var ég kyrr og horfði á hægri höndina á gólfinu, umkringda glerbrotum. Einhvern veginn vissi ég að alla veganna eitt glerbrot hafði stungist inn í hana. Það reyndist hárrétt; þegar ég tók hendina af gólfinu sá ég að úr henni stóð nokkuð stórt glerbrot úr lófanum. Það blæddi úr sárinu yfir allt gólfið og eldhúsborðið, og síðan í baðvaskinn þegar ég fór þangað til að skola sárið og setja plástur á það.

Það er víst ekkert tekið út með sældinni að skipta um perur.

Sætara heimili

2006-07-12T20:52:00.000Z

Svo virðist vera sem að eitthvað stórvægilegt hafi gerst inni í hausnum á mér í fríinu. Ég er allt í einu haldinn óstjórnlegri löngun til að kaupa ýmsilega hluti til að fegra heimilið mitt. Þetta gengur svo langt að ég er meira að segja farinn að kaupa blómavasa og málverk. Hvar endar þetta eiginlega?

Heimili sæta heimili

2006-07-10T18:53:00.000Z

Það er gott að vera kominn heim. Ég er meira að segja búinn að sofa í MÍNU rúmi og fara í MÍNA sturtu.

Rétt bráðum fer ég í mat til foreldranna, sem er annað sem ég saknaði afar mikið.

Meira seinna ef ég nenni.

Síðasti dagurinn

2006-07-08T17:44:00.000Z

Í dag er síðasti (heili) dagurinn minn í Bræðraást. Ég mun eyða stórum hluta morgundagsins í Nýju-Jórvík, fyrst ég þarf á annað borð að fara þangað til að fara í flugvél.

Ég átti eftir að skrifa um 4. júlí, sem er nokkuð stór dagur hér á landi. Þennan dag fór ég í grillveislu hjá mömmu vinar Abby, og var þar nóg af góðum mat og öli. Það er ekki ofsögum sagt að ég hef sjaldan verið jafn saddur og ég var að þessum herlegheitum loknum. Eftir þetta keyrði grillhópurinn niður í miðbæ, en sú bílferð tók ansi langan tíma sökum óvenjumikillar umferðar. Miðbærinn reyndist síðan vera troðfullur af fólki, ekki ólíkt því sem gerist á 17. júní eða menningarnótt í Reykjavík. Lokaáfangastaður okkar í miðbænum var krifstofubygging þar sem ein í hópnum vinnur. Þar höfðum við mjög gott útsýni yfir veglega flugeldasýningu sem fór fram yfir listasafninu. Þaðan gátum við líka séð að breiðgatan sem liggur út frá umræddu safni var full af fólki langar leiðir. Nokkuð magnað.

Annað sem ég hef gert er að fara í gegnum langt ferli til að taka út reiðufé með kreditkortinu í banka (ég þurfti að sýna vegabréf og ökuskírteini, sem og að gefa þumalfar). Ástæðan fyrir því að ég þurfti að grípa til þessarar leiðar er að debetkortið mitt rann út um síðustu mánaðamót, og ég hef ekki grænan grun um hvert PIN númerið á kreditkortinu er.

Einnig fór ég nokkuð langa leið norður til verslunarmiðstöðvar sem heitir Franklin Mills. Ástæðan fyrir því að ég fór svo langa leið til að heimsækja svo leiðan stað er að Anna Panna bað mig um að festa kaup á nokkrum hlutum í búð af gerðinni Bath&Body Works, en samkvæmt Internetinu er eina slíka búðin hér í borg að finna í umræddri miðstöð. Ég nýtti ferðina til að kaupa bakpoka (til að auðvelda mér að ferja heim allt draslið sem ég hef keypt) og DVD-diska (til að horfa á).

Þá er hið helsta upptalið í bili.

Napólí

2006-07-05T23:51:00.000Z

Ég lofaði lýsingu á ferðalagi mínu til borgarinnar Naples, FL. Í sannleika sagt var það þó svo viðburðalítið að það er varla frá því segjandi. Það helsta sem gerðist var að ég kláraði loksins síðustu bókina í The Baroque Cycle, og byrjaði á og kláraði The Illuminatus! Trilogy, sem Abby lánaði mér. Ég hafði heyrt af þeirri steypu áður, og varð ekki fyrir vonbrigðum með hana. Já, og svo brann ég á fótunum. Sólin þarna er ansi sterk, og ég gleymdi að setja sólarvörn á blessaðar bífurnar. Þessi bær, Naples, er þó almennt séð mjög notalegur og rólegur - allt tandurhreint og fullt af gömlu fólki. Húsið sem ég gisti í var líka gríðarlega flott og vel innréttað; enda er mamma Abby hönnuður sem kann sitt fag.

Ég er farinn að fyllast ansi mikilli heimþrá, og það verður gott að koma heim. Ég læt vita ef eitthvað markvert gerist þessa daga sem eftir eru.

Úbbs

2006-07-03T22:34:00.000Z

Fréttirnar af andláti mínu eru stórlega ýktar. Hið sama verður þó ekki sagt um fréttir af skilningsleysi mínu.

Fimmtudaginn fékk ég út frá því að þá skrapp Abby norður til Indiana til að vera viðstödd jarðarför afa síns. Einhvern veginn tókst mér að misskilja þetta þannig að það væri dagurinn sem ég færi aftur til Fílu. Hið rétta er að það gerðist ekki fyrr en í dag, en auðvitað hafði ég ekki tök á að uppfæra upplýsingarnar í netleysinu.

Ég vona að ég hafi ekki valdið lesendum mínum óþarfa áhyggjur með þessu.

Lýsing á ferðalaginu kemur svo síðar.

Yfirvofandi netleysi

2006-06-26T02:36:00.000Z

Fyrst: Í gær fór ég í skógarrölt með Abby og fýr að nafni Jim. Þetta var mjög notalegt og afslappandi þrátt fyrir að það hafi ringt töluvert í gær. Í dag fór ég á leiksýningu. Verkið hét Deadly She-Wolf Assassin of Armageddeon, og fjallar um japanska leigumorðingja. Mikið var slegist (á stílískan, danskenndan hátt) í þessu verki, og það var frekar fyndið á köflum.

Að þessu sögðu tilkynnist hér með formlega að ég verð netsambandslaus frá og með morgundeginum og fram að fimmtudeginum, þar sem ég verð í húsi í Naples, FL þann tíma, og þar er ekki boðið upp á Internet.

Vonandi lifi ég þessa reynslu af.

Morgunraus gefur þreytu í haus

2006-06-23T13:33:00.000Z

Ég er vakandi fyrir hádegi í fyrsta sinn um frekar langa hríð. Ástæðan fyrir þessari svívirðu er sú að mamma gestgjafans og stjúppabbi komu hingað í gær til að hjálpa til við ýmsar framkvæmdir hér í húsi. Þar sem þetta ofurhressa lið vaknaði allt saman tæplega 8 neyddist ég til að drattast á fætur um svipað leyti (ekki síst þar sem ég þurfti að sofa í stofunni).

Önnur afleiðing af þessu brambolti var sú að ég var hálfpartinn rekinn út drjúgan hluta dagsins í gær. Ég rölti um borgina í fimm tíma eða svo. Meðal þess sem ég gerði var að heimsækja gamalt fangelsi. Þetta er stórsniðugt safn þar sem maður röltir um með heyrnartól í eyrum og hlustar á Steve Buscemi og fleiri segja sögu fangelsisins. Einnig skrapp ég í safn helgað Auguste Rodin; þar keypti ég litla eftirlíkingu af hans frægasta verki (Nú er ég formlega orðinn menningarviti, er það ekki?). Því miður var stóra listasafnið lokað þegar ég ætlaði að sækja það heim, en ég hef nægan tíma til að bæta úr því síðar.

P.S. Sem betur fer olli þessi gönguferð í hitanum því að ég var ansi þreyttur um kvöldið og náði því að sofna frekar snemma. Ég er því ekki eins þreyttur og ætla mætti.

Hitinn ... bévaður hitinn

2006-06-21T19:43:00.000Z

Ég afsaka langt hlé á milli blogga, en ég hef ennþá ekkert sérstaklega mikið að segja. Ég hef verið gríðarlega latur undanfarna daga og ekki nennt að gera neitt að ráði. Lamandi hitinn hjálpar alls ekki til þar. Ekki að ég sé að kvarta samt - það stóð ekki til að gera neitt sérstaklega mikið í þessari ferð.

Ég fór reyndar í afmælisveislu í gær, hjá 39 ára gamalli konu af asískum ættum. Hún leit út fyrir að vera nær því að vera 29 ára; hún þakkaði nálastungunum unglegt útlit sitt. Í þessari veislu, eins og oft áður, þurfti ég að kynna mig fyrir nokkrum Könum. Þeir verða alltaf mjög hvumsa þegar þeir heyra nafnið mitt og vilja oftar en ekki reyna að bera það fram aftur og aftur til að reyna að ná því rétt ... fæstum tekst að komast nálægt réttum framburði. Í neyðartifellum hef ég stungið upp á því við suma að þeir kalli mig bara Hal, sem er gott nafn (fyrir þá sem ekki ná tilvísuninni: Horfið á hina stórgóðu mynd 2001: A Space Oddysey, takk).

Á mánudaginn er ferð til Florida með einum af einhverfu drengjunum sem eru í bekknum sem Abby vinnur með. Ég veit ekki hvort ég verð nettengdur þar, eða hvort ég tek tölvuna yfir höfuð með, en þar sem ég verð án efa lamaður af hita allan þann tíma sem ég verð þar, þá er slíkt líklega aukaatriði.

17. júní

2006-06-17T18:47:00.000Z

... er dagur sem ekki fer mikið fyrir hér fyrir westan. Hér er annars alveg jafn heitt og undanfarið - á meðan rignt hefur á Íslendinga alla dagana í júní fyrir utan einn, hefur aðeins rignt einn dag hér í borg ... og sá skúr varði ekki nema í nokkrar mínútur.

Dagskráin er sú sama og áður; leti og menningarstarfsemi. Ég hef ekki horft á einn einasta fótboltaleik hingað til, en við Abby ætlum að fara og horfa á einn slíkan rétt bráðum víst. Hér eru leikir sýndir á mörgum stöðvum og auðvelt að horfa á þá, ólíkt því sem tíðkast heima á Fróni, þar sem menn gerast svo kræfir að loka fyrir erlendar stöðvar sem sýna frá leikjunum, bara svo að aumingja einokunarveldið verði ekki af tekjum.

Óttaleg innihaldsleysa er þetta. Ég skrifa næst þegar ég hef meira að segja.

Matur

2006-06-14T17:07:00.000Z

Borgin Bræðraást er þekkt fyrir ýmsan mat sem er uppruninn hér. Það eina sem ég hef smakkað hingað til er ostasteik. Tveir frægustu staðirnir sem bjóða upp á slíkt, Geno's og Pat's, eru við sama götuhornið sem er ekki nema í um tæplega fimm mínútna göngufjarlægð frá húsinu sem ég gisti í. Ég hef bara fengið mér ostasteik einu sinni; það var hjá Geno's í fyrradag. Þar rak ég augun í ýmis skilti í gluggunum. Eitt þeirra var yfirlýsing þess efnis að staðurinn styður fjölskyldu lögreglumannsins Daniel Faulkner, sem var myrtur árið 1981. Einnig sá ég skilti sem á stóð: "This is America. When ordering, speak English." Ég hélt að þetta væri eitthvað sem hefur verið þarna lengi, en síðar frétti ég að þessi skilti voru sett upp nýlega, og eru orðin fréttaefni.

Það er mjög gaman að fletta því sem maður hefur séð upp í Wikipedia, en ennþá skemmtilegra að geta flett því upp í fréttamiðlum.

Kanaveldishelgi

2006-06-12T18:42:00.000Z

Eftir stressandi ferðalag er mjög gott að geta slappað af og slæpst. Það er einmitt nákvæmlega það sem ég hef verið að gera hérna hingað til. Þar sem ég hef eiginlega aldrei tekið mér almennilegt frí af neinu tagi áður á minni fullorðinsævi eru þetta óneitanlega ágætisviðbrigði.

Abby hefur verið mjög dugleg að sækja listviðburði hér í borg, og ég hef dregist með í slíkt. Laugardagskvöldið hófst á mjög undarlegum tónleikum fýrs nokkurs sem fiktaði með skrýtin hljóð sem hann bjó til með rafmagnsgræjum. Þetta fór fram í listagalleríi sem heitir Nexus og er alveg við hliðina á elstu götu Bandaríkjanna, Elfreth's Alley. Eftir þann súrleika var haldið á útgáfuteiti hljómsveitarinnar Cordalene; það fór fram í Tai Chi stúdíói. Umrædd hljómsveit lék fyrir dansi ásamt tveimur öðrum. Það besta við þetta teiti var að það kostaði ekki nema 10 dollara inn á það, og þegar inn var komið var gestum frjálst að þamba eins mikið tekíla og þeir höfðu lyst á. Ég reyndist hafa ansi góða lyst á þeim veigum, og fékk því töluvert mikið fyrir inngöngugjaldið. Nóttin endaði á stuttu stoppi í búllu sem nefnist Transit, hvar tónlist er spiluð og dans er stiginn. Allt mjög hressandi.

Í gær var síðan frekari menningarvitismi - hálfgerðir nútímaklassískir tónleikar með víbrafónum, söng, og fiðluspili. Frekar töff, og haldið í mjög áhugaverðu safni sem gaman væri að heimsækja aftur til að skoða almennilega. Vinur Abby, Dan að nafni, kom með á þessa tónleika, og eftir þá fórum við til mömmu hans í mat, en Abby bjó einmitt hjá henni áður en hún flutti í húsið sem hún býr í núna, þar sem ég er einmitt í þessum skrifuðu orðum.

Niðurstaða: Hingað til hefur þetta verið ansi fínt frí.

Stressistressistress

2006-06-10T20:10:00.000Z

Jæja, þá er ég kominn heilu og höldnu í land tækifæra og vel útilátinna máltíða. Ferðalagið var frekar stressandi, verður að segjast. Stressið hófst strax við innritun - vegna bilunnar í færiböndum hafði innritunin tafist þegar ég mætti á Leifsstöð, og því hafði safnast gríðarlega löng röð. Sem betur fer lagaðist ástandið þegar á leið, og ég komst í innritun í nokkurn veginn tæka tíð. Þá tók því miður ekki skárra við. Ég var krafinn um heimilisfangið þar sem ég gisti hér í Ammríkunni; Kanastjórnvöld vilja víst að allir sem koma í landið þeirra gefi upp heimilisfang, ellegar hleypa þau viðkomandi ekki inn í landið. Því miður hafði ég heimilisfang alls ekki á reiðum höndum, þar sem gestgjafi minn ætlaði að sækja mig á flugvölinn, og ég sá því aldrei ástæðu til að fá heimilisfangið. Ég reyndi að hringja í hana til að fá þetta uppgefið, en hún svaraði ekki. Mér tókst samt að komast í gegnum innritunina með því að lofa að ég myndi komast að heimilisfanginu áður en ég stigi um borð í vélina.

Þrátt fyrir ítrekaðar hringingar tókst mér ekki að ná í gestgjafann, og var því enn frekar stressaður í röðinni inn í vélina. Þegar ég náði enda hennar var mér vísað til baka á þjónustuborð - en það reyndist vera vegna þess að ég hafði einhverra hluta vegna ekki verið skráður í sæti. Ég skokkaði því þangað, fékk annan miða með sæti, fór aftur í röðina og inn í flugvélina. Gálgafrestur.

Gálgafresturinn reyndist vera óvenju ljúfur, þar sem ég hafði einhverra hluta vegna hafnað á fyrsta farrými. Þetta fattaði ég ekki alveg strax - það fyrsta sem ég hugsaði var að ég virtist hafa meira fótarými en ég var vanur að hafa í flugvélum. Þegar ég hafði loksins náð þeirri staðreynd að ég var á fyrsta farrými varð ég óneitanlega glaður, þrátt fyrir stressið. Ég mæli með fyrsta farrými: Ég fékk einstaklega góðan mat, rauðvín, snittur, brauð, og horfði á Batman Returns á litlum DVD-spilara. Mjög notalegt.

Að notalegheitunum loknum var komið að skuldadögum: Núna þýddi víst ekkert annað en að fá fjárans heimilisfangið. Ég vissi að farsíminn minn myndi ekki virka, en ég vonaðist til að geta komist í tíkallasíma einhvers staðar á leiðinni að eftirlitsstöðinni, þar sem ég yrði krafinn um heimilisfang (Reyndar eru allir sem koma til Ameríku krafðir um ýmsar fleiri upplýsingar sem þeir þurfa að gefa upp með því að fylla út tvö mismunandi eyðublöð sem þeir fá afhent með flugmiðanum. Ég hafði nægan tíma til að dunda mér við að fylla þau út í flugvélinni, en varð auðvitað að bíða með að skrá heimilisfangið). Þetta reyndist óskhyggja; enga slíka síma var að finna, þannig að ég ákvað að reyna að komast í gegn án þess að hafa skráð heimilisfang. Niðurstaða: Það mátti ekki. Ég var sendur til baka um hæl. Ég labbaði því alla leið til baka að flugvélinni og talaði við flugfreyju, sem reyndist vera Ameríkani sem átti farsíma sem ég gat notað til að hringja enn og aftur. Sem betur fer fékk ég samband í þetta skiptið, og gat skrifað niður þetta bévaða heimilisfang á eyðublöðin. Þetta dugði til að koma mér í gegnum eftirlitið í annarri tilraun, og skömmu síðar var ég kominn á gangstéttina fyrir utan JFK. Biðin eftir fari tók aðeins lengri tíma en ég bjóst við, og stressið var næstum farið að blossa upp aftur þegar gestgjafinn kom á kagganum sínum. Þá fyrst gat ég slappað af. Við hittum vini gestgjafans í New York, héngum á börum og átum tælenskan mat.

Að þessu loknu keyrðum við til Bræðraástar, sem er rúmlega tveggja tíma akstur. Þar sem Kanarnir eru fjórum tímum á undan okkur Frónbúum var klukkan orðin vel rúmlega fjögur að íslenskum tíma þegar ég gat loksins farið að sofa. Mér hefur verið úthlutað litlum og frekar hörðum bedda, en mér þótti engu að síður mjög ljúft að sofa á honum eftir allt vesenið sem ég hafði lent í.

Lýkur hér með fyrstu umfjöllun minni um ævintýri mín í Ameríku. Munið krakkar: Ef þið eruð að fara til Ameríku, verið þá viss um að þið vitið hvar þið ætlið að gista.

Útför

2006-06-09T13:51:00.000Z

Þá er komið að því. Ég flýg af landi brott klukkan 17:00. Þegar ég pantaði miðann taldi ég að ég væri ekki að skilja neitt eftir að ráði hér heima, en síðan þá hefur allt annað komið í ljós. Svona er þetta.

En einn mánuður er svo sem ekki það lengi að líða.

Skák

2006-06-08T12:56:00.000Z

Skákforrit, eftir því sem ég veit best, virka í grófum dráttum þannig að skoðaðir eru eins margir leikir fram í tímann og mögulegt er og besti leikurinn í stöðunni fundinn út frá því hver þeirra leiðir til bestu niðurstöðu, samkvæmt tölugildum sem sett eru á mögulegar niðurstöður.

Nú er eitt sem velta má fyrir sér í þessu sambandi: Fræðilega séð væri mögulegt að víkka slíkt forrit út, þannig að það geti skoðað alla mögulega leiki í öllum mögulegum skákum. Vissulega er fjöldi þeirra gríðarlega hár, en hann er engu að síður endanlegur.

Gefum okkur að slíkt forrit sé til. Hvað gerist þá ef við etjum tveimur slíkum forritum hvort á móti öðru? Myndi annað þeirra þá kannski gefast upp strax í upphafi, þar sem það sæi fram á að það gæti ekki unnið? Ef svo er, er þá ekki líklegt að það væri hvítur, þar sem almennt séð virðist halla örlítið á svartan í skák?

Hvað haldið þið?

Lífið

2006-06-06T10:54:00.000Z

Er nokkuð fínt þessa dagana.

Já, bara nokkuð fínt held ég ..

Fjórir dagar

2006-06-05T13:22:00.000Z

... frá því að ég bloggaði síðast.
... þangað til ég fer til Ameríku.

Aumingja Framsókn

2006-06-01T20:37:00.000Z

Ólafur Hannibalsson mætti í Kastljós í kvöld og talaði við einhvern Framsóknarmann um ásakanir sem hafa komið fram þess efnis að Framsóknarmenn hafi staðið fyrir smölunum um síðustu kosningar þar sem útlendingum var borgað fyrir að kjósa Framsóknarflokkinn. Ekki veit ég hvað er til í þessu, en hitt veit ég að það er umhugsunarefni að Framsóknarflokkurinn fékk 8,5% utankjörfundaratkvæða, en einungis 6,25% atkvæða í heildina (svipað gildir reyndar um Sjálfstæðisflokkinn, sem fékk 46,1% utankjörfundaratkvæða og 42,9% heildaratkvæða, en hlutfallslega er það þó minni munur).

Það sem mér þótti merkilegast í þessum Kastljóssþætti voru svör Framsóknarmannsins við ásökununum. Hann hafði lítið annað að segja að þetta væru nú allt óstaðfestar sögusagnir sem Ólafur Hannibalsson stæði fyrir í þeim tilgangi að koma höggi á flokkinn, og að fólk svífist almennt einskis til að reyna að koma höggi á þennan blessaða flokk. Í þessu samhengi nefndi hann meðal annars nýleg mótmæli þar sem einn mótmælanda bar spjald sem á stóð: "Drekkjum Valgerði, ekki Kárahnjúkum." Allt þetta virðist í hans huga benda til allsherjarsamsæris um að skemma sem mest fyrir aumingja Framsóknarflokknum og grafa sem mest undan stöðu hans.

Ég hef aðeins eitt um þetta að segja: Mér sýnist sem að Framsóknarfólk megi alveg fara í allsherjar naflaskoðun, meðal annars til að takast á við það ofsóknarbrjálæði sem það virðist meira og minna vera uppfullt af. Þetta er svo aumingjalegt rugl að það er tæpast fyndið.

P.S. Ef um raunverulegt samsæri er að ræða, þá er ég víst með í því. Ég get hins vegar því miður ekkert að því gert að ég hef einstaklega illan bifur á Framsóknarflokknum og Sjálfstæðisflokknum báðum.

Blöh

2006-06-01T13:49:00.000Z

Gestapó er farið í sumarfrí. Það er frekar leiðinlegt, en ég er samt ekki nærri því jafn leiður yfir því og í fyrra, líklega vegna þess að ég er orðinn það gamalgróinn þarna að fíknin er komin niður á viðráðanlegt stig.

Svo fer ég auðvitað út í næstu viku, og þó ég hyggist taka fartölvuna með, þá er ekki endilega víst að ég komi til með að hanga á alnetinu svo gríðarlega mikið.

Fullorðins

2006-05-29T23:24:00.000Z

Ég fór á fund hjá húsfélaginu í kvöld. Mér fannst ég vera alveg rosalega fullorðinn og gáfulegur þarna, og slapp bara vel frá þessu öllu saman. Fyrir utan eitt: Núverandi formaður félagsins er búin að ákveða að gera mig að næsta formanni, og ég sé ekki hvernig ég mun geta sloppið undan því. Uss - ég veit ekkert um rekstur og peninga og klúðra þessu án efa herfilega.

Helgin

2006-05-28T23:26:00.000Z

... var fín, og áhugaverð með eindæmum.

Gulrót

2006-05-26T16:42:00.000Z

Stal frá Tigru:

You scored as Carrot Ironfounderson. You are Captain Carrot Ironfounderson of the City Watch in the greatest city on the Disc - Ankh-Morprok! A truly good natured, honest guy, who knows everyone, and is liked by all. Technically a dwarf, but only by adoption. You'd rather not be reminded that you are the true heir to the throne, but that does explain why people naturally follow your orders...

Lord Havelock Vetinari

75%

Carrot Ironfounderson

75%

Gytha (Nanny) Ogg

63%

Rincewind

63%

Death

56%

Commander Samuel Vimes

56%

Esmerelda (Granny) Weatherwax

44%

The Librarian

44%

Cohen The Barbarian

31%

Greebo

31%

Which Discworld Character are you like (with pics)
created with QuizFarm.com

Þetta var samt tæpt ... eins og sést þá er ég líka 75% Vetinari, en prófið fór út í bráðabana til að gera uppi á milli þeirra. Möguleikarnir sem ég átti að velja á milli þar voru: 'Are you always in control of every situation?' og 'Are you very honest?'. Ég valdi hinn síðari, enda er ég heiðarlegur með eindæmum.

Samt blundar í mér Machiavellískur einræðisherra, virðist vera ...

Afstaða

2006-05-24T16:14:00.000Z

Þú ert 60% hlynntur S lista
Þú ert 30% hlynntur B lista
Þú ert 10% hlynntur V lista
Þú ert 0% hlynntur F lista
Þú ert 0% hlynntur D lista

Samkvæmt þessu

Þá er það ákveðið ... þó er samt ekki eins og um mikla kúvendingu sé að ræða.

()

2006-05-23T22:33:00.000Z

Ég hef sjaldan verið jafn tómur að innan og ég er þessa dagana.

Á slíkum stundum er óhjákvæmilegt, þótt leitt sé, að hugurinn fyllist vangaveltum um dauðleikann. Ég er lítt trúaður á að nokkuð taki við eftir þessa tilvist. Við höfum bara þetta eina tækifæri til að reyna að höndla hamingjuna. Það sorglegasta er að ég tel mig ekki færan um það. Mér finnst eins og allir aðrir upplifi hluti sem ég hef aldrei upplifað, og mun aldrei gera. Mér finnst líf mitt tómt og tilgangslaust.

Mér leiðist að skrifa á þessum nótum hérna, þar sem ákveðið fólk sem ég þekki sem les þessi skrif mín reglulega væri víst til að reyna að senda mig í einhvers konar meðferð í kjölfar þess að lesa þunglyndisraus af þessu tagi - en slíkt er langt í frá það sem ég þarf.

Ég þarf ást.

Kosningar

2006-05-22T13:29:00.000Z

Kosningar næsta laugardag já ...

Það skemmtilegasta við þær er að svo virðist vera sem að Framsóknarflokkurinn sé loksins að fara að þurrkast út. Þetta er löngu tímabær atburður, sem verður mikil hagsbót fyrir Íslendinga. Ég hef aldrei skilið hvernig þessum flokki tekst alltaf að klóra í bakkann um hverjar einustu kosningar, þrátt fyrir að hafa venjulega álíka mikið fylgi í könnunum og and-mörgæsaflokkur myndi fá í Antartíku. Ég vona innilega að flokknum takist ekki að rífa sig upp á eigin hári enn og aftur, og að í kjölfarið muni forysta hans ákveða að hætta loksins þessu bulli og leggja flokkinn niður.

I'm listening to Neil Young

2006-05-19T02:11:00.000Z

... and I gotta turn up the sound.

Geggjuð plata!

Ávísun á gæsahúð ... langt síðan maður hefur heyrt svona góðan boðskap í jafn góðum umbúðum.

Staðan

2006-05-18T18:32:00.000Z

Undankeppni Söngvakeppni evrópskra sjónvarpsstöðva hefst eftir hálftíma.

Ég er í vinnunni.

Ég á ekki sjónvarp.

Ég á ekki mikið lausafé.

Hvað skal gera?

(Elko lokar eftir hálftíma líka ... freistandi)

Fjárinn

2006-05-16T00:04:00.000Z

Mér datt í hug dálítið mjög sniðugt til að blogga um í gær - alla veganna minnir mig að það hafi verið mjög sniðugt, en ég man því miður engan veginn hvað það var. Ég held að þann lærdóm megi draga af þessari reynslu að best er að skrifa niður hugmyndir sínar um leið og þær koma manni í koll - því að annars kemur það manni í koll síðar.

Til þess að hafa þessa færslu ekki algjörlega innihaldsslausa, þá get ég í leiðinni upplýst að ég hef ekki verið að gera af viti undanfarna daga.

P.S. Áhugavert lesefni (PDF)

Skref

2006-05-13T23:54:00.000Z

1. Byrja að nota amaroK.
2. Skrá sig í gegnum það forrit á last.fm.
3. Sjá lista frá last.fm á síðu Nornarinnar (í nýju ljósi).
4. Herma eftir henni.
5. ???
6. Profit!

Ég var að spá ...

2006-05-12T13:22:00.000Z

Af hverju er talað um hljóðmengun og sjónmengun?

Væri ekki einfaldara að kalla þessi fyrirbæri hávaða og ljótleika?

Spennó

2006-05-10T23:16:00.000Z

Er það til marks um innihaldslaust líf að það mest spennandi sem er að gerast í því er Linuxgrúsk?

Fokkit, þetta er gaman.

Mér til mikillar gleði komst ég að því að Linuxútgáfan af DC++ virkar vel á Fedora Core 5. Ég fékk hana aldrei til að virka á fjarkanum.

Hvað MSN Messenger varðar þá tókst mér eftir þó nokkurt streð að fá það forrit til að keyra, en ekki í nothæfu ástandi; það krassar alltaf frekar fljótt. Ætli ég bíði ekki bara þolinmóður eftir því að einhver Linuxclientinn útfæri fítusana sem mig langar í, eða þá bara læri að lifa án þeirra?

Auster

2006-05-08T19:28:00.000Z

Það er orðið tímabært að gefa skýrslu um ástand Austers. Hann hefur verið frekar laslegur undanfarið - ég fékk aldrei þráðlausa kortið til að virka í honum, og svo var harði diskurinn farinn að hegða sér mjög undarlega; stundum var einstaklega erfitt að lesa af honum, sem benti til að hann ætti ekki langa lífdaga framundan. Ég drattaðist því í Hugver og fékk nýjan disk og netkort (þar sem mér tókst eftir langa mæðu að sannfæra verkstæðisfýrinn hjá Hugveri um að þetta væri örugglega bilun í kortinu sjálfu en ekki Linuxreklunum sem ég var að nota - þetta reyndist rétt hjá mér).

Ég notaði síðan tækifærið, fyrst að svo heppilega vill til að Fedora Core 5 er tiltölulega nýkomið út, og setti það upp á endurnýjuðum Austernum. Skemmst er frá því að segja að nú svínvirkar hann, og ég get því hætt að nota Pratchett (eldgamla og einstaklega hægvirka lappann sem ég á til vara).

Eftir að ég frétti af tilvist amaroK er einn meintur galli sem ég sá við Linux leystur; skortur á almennilegu tónlistarspilunarforriti. Þetta snilldarforrit hefur allt sem iTunes hefur (sem ég þarf á að halda að minnsta kosti), og fleira til.

Þá er í rauninni einungis eitt eftir. Almennilegt forrit fyrir MSN sem býður upp á alla flottu fítusana sem Microsoft hafa verið að dæla í það forrit; svosem 'personal messages', 'emoticons' sem er hægt að deila með öðrum með nokkrum handtökum, og kannski hugsanlega webcam. Kannski að MSN Messenger 7 með hjálp Wine sé málið?

Ég fór

2006-05-06T21:26:00.000Z

... í IKEA í dag og keypti sjónvarpsborð, stand fyrir DVD-diska, og gólflampa; auk nokkurra smáhluta. Þetta ferjaði ég allt saman einn míns liðs heim til mín, setti saman, og kom fyrir á viðeigandi stöðum. Núna líkist stofan vöruskemmu örlítið minna en áður.

Það besta við þennan leiðangur var að hann var ekki sérstaklega kostnaðarsamur; það dót sem ég fann þótti mér bæði ódýrt og ágætlega útlítandi. Vonandi er smekkur minn ekki alveg úti úr öllu korti. En mér finnst þetta flott, og það skiptir líklega höfuðmáli.

Og já ...

2006-05-03T16:12:00.000Z

Mér láðist víst að tilkynna að frænka mín og breski fýrinn hennar sem bjuggu hjá mér fluttu til foreldra hennar á sunnudaginn. Ég hafði um svo margt annað að hugsa að ég hef eiginlega ekki meðtekið þessa staðreynd enn, þrátt fyrir að hún sé mjög sýnileg; fá húsgögn eru eftir í íbúðinni, þar sem ég átti minnihlutann af því sem þar var.

Ég þarf líklega að fara í fleiri en einn innkaupaleiðangur á næstunni.

Hárið

2006-04-30T22:20:00.000Z

Vegna fjölda áskoranna (nánar til tekið er fjöldinn ein áskorun) hef ég ákveðið að birta mynd af því hvernig hárið á mér lítur út núna. Myndina má sjá hérna. Því miður á ég ekkert annað en lélega símamyndavél, en myndin ætti samt sem áður að koma einhverju til skila.

P.S. Ég vil þakka öllum stuðninginn sem ég hef fengið vegna nýjasta ruglsins í farsanum sem er ævisaga Þarfagreinis. Hvað sem öllu öðru líður verður þó mjög löng bið á því að ég geti treyst nokkrum væntingum sem ég geri mér um tilfinningar annarra í minn garð. Einn undirtónninn í téðri ævisögu er nefnilega tilhneiging til atvika sem drepa slíkar væntingar niður kerfisbundið. Þetta nýjasta atvik er dropinn sem lét flæða upp úr yfirfylltum mælinum.

Undur og stórmerki

2006-04-27T18:48:00.000Z

Í dag slysaðist ég inn á hárgreiðslustofu og lenti þar undir skærum. Þar sem slíkt gerðist síðast einhvern tímann skömmu fyrir jólin 2004, þá er hér um að ræða töluverð viðbrigði, en þó ekki vonbrigði. Það er ágætt að fara ekki úr hárum stöðugt eins og argasti köttur og vera sífellt í basli með að færa hárlokka úr sjónsviðinu.

Uppgötvun

2006-04-26T12:09:00.000Z

Það er magnað hvað maður getur dottið niður í að velta fyrir sér í svefnrofunum. Í gærnótt tók ég upp á því að spila lög í hausnum, og gekk það ágætlega, þangað til ég kom að köflum þar sem ekki er sungið. Þá átti ég erfiðara með að muna stef.

Það er alþekkt fyrirbæri að fólki gengur oft betur að muna texta ef það getur tengt hann við lag, en hið gagnstæða virðist hrjá mig - vinstra heilahveli mitt er sennilega það yfirgnæfandi að ég lifi og hrærist í orðum. Þetta gæti vel útskýrt fremur takmarkaða hæfileika mína á sviði tónlistar.

Merkilegt, ekki satt?

Sailing To Philadelphia

2006-04-23T17:55:00.000Z

Ég hef fest kaup á miða til Nýju Jórvíkur (New York) með flugvél sem fer frá Keflavík (Coilbay) þann 9. júní og einnig með annarri sem fer í öfuga átt þann 9. júlí. Þar sem Nýja Jórvík er stutt frá Bróðurást (Philadelphia), þá ætti að vera hægur vandi að komast þangað á milli.

Þetta verður í fyrsta sinn í afar langan tíma sem ég fer til útlanda mér til skemmtunar, og í fyrsta sinn frá 1992 sem ég stíg fæti á ameríska grundu. Þetta ætti því að verða áhugavert.

Líf mitt í tölum

2006-04-21T16:44:00.000Z

Ég tel mig nú bara góðan að fá ekki falleinkunn í heildina:

This Is My Life, Rated
Life:	6.8
Mind:	7.6
Body:	6.5
Spirit:	7.3
Friends/Family:	4.7
Love:	2.1
Finance:	8.1
Take the Rate My Life Quiz

Góðar fréttir öll

2006-04-19T20:21:00.000Z

Krummi verður ekki þrífættur. Brotna löppin er loksins farin að gróa.

*Dansar kattadansinn ógurlega*

Meiri kóði

2006-04-17T14:17:00.000Z

Bangsímon nokkur náði að brjóta kóðann minn góða sem ég henti inn á þráðinn Hinn Baggalútíski Bletchley Park. Kauði launaði mér lambið gráa með því að henda inn sínum eigin kóða, sem mér gengur hægt að ráða. Það gengur þó, og ég mun brjóta þetta helvíti, ellegar skal ég hundur heita, eða þá hugsanlega múrmeldýr.

Þannig að þið skulið ekki dirfast að reyna við þetta - ef einhverjum tekst að ráða þetta á undan mér, þá verð ég fúll.

Mér finnst þær einmitt góðar

2006-04-14T16:44:00.000Z

You Are Olive Green

You are the most real of all the green shades. You're always true to yourself.
For you, authenticity and honesty are very important... both in others and yourself.
You are grounded and secure. It takes a lot to shake you.
People see you as dependable, probably the most dependable person they know.

What Color Green Are You?

Langur dagur

2006-04-14T16:35:00.000Z

Dagurinn í dag er, að öðru jöfnu, líklega leiðinlegasti dagur ársins. Bannað er með lögum að gera nokkuð sem er nálægt því að vera skemmtilegt, og fólk fer að mestu eftir þeirri tilskipun.

Þetta er reyndar ágætt. Það er merkileg kyrrð yfir öllu, eins og ég tók eftir þegar ég rölti heim frá foreldrum mínum upp úr miðnætti. Afskaplega fáir bílar á ferli, og þegar ég kom inn í húsið sem ég bý í heyrðist þar ekki múkk.

Annars heyrði ég eitt sinn af hefð nokkurri meðal fólks í Kaliforníuríki Ameríku sem aðhyllist annan lífsstíl en þann hefðbunda. Þessi hefð snýst um að gera Good Friday að Good Fry Day. Og giskiði nú hvað felst í því.

Tilkynning

2006-04-12T22:31:00.000Z

Shangri-la er fínasta plata.

P.S. Það er gaman að hala niður tónlist af netinu.

Hagakure

2006-04-10T16:08:00.000Z

The way of revenge lies in simply forcing one's way into a place and being cut down. There is no shame in this. By thinking that you must complete the job you will run out of time. By considering things like how many men the enemy has, time piles up; in the end you will give up. No matter if the enemy has thousands of men, there is fulfillment in simply standing them off and being determined to cut them all down, starting from one end. You will finish the greater part of it.

Hahaha

2006-04-08T15:34:00.000Z

"If it weren't for C, we'd be writing programs in BASI, PASAL, and OBOL."

Fengið héðan, í gegnum hana.

Rafmæli

2006-04-05T12:27:00.000Z

Ég á svokallað rafmæli á Gestapó í dag. Ég er eins og hálfs árs. Nánar til tekið þá þýðir þetta að í dag er liði eitt og hálft ár frá því að ég skráði mig á þetta 'spjallsvæði'.

Gestapó er ólíkt öllu öðru sem ég hef kynnst, fyrr og síðar. Andinn sem þar ríkir held ég að sé nánast einsdæmi í veröldinni, og það væri þarft verk fyrir félagsfræðinga að gera úttekt á þessu samfélagi, sem er jafn flókið og margbrotið og hvert annað samfélag í 'raunheimum', með sín eigin viðmið, reglur og hefðir.

Ég tel að það hafi gert mér mjög gott að tilheyra þessu samfélagi í þennan merkilega langa tíma sem ég hef lifað alterególífi mínu þar. Ég hef kynnst fádæma mörgu góðu fólki þar; marga hef ég hitt í raunheimum, en aðra hef ég látið mér nægja að eiga samskipti við á hinum stafræna vettvangi enn sem komið er. Svo má heldur ekki gleyma því að ég tel að þátttaka mín í skrifum þarna hafi eflt tök mín á íslenskunni til mikilla muna, en færni mín í því tungumáli var farin að dala verulega sökum þess að langflest þess sem ég las og skrifaði fyrir tíð Gestapó var á ensku, fremur en móðurmálinu. Og þó ég hafi eitthvað kunnað inn á rím, stuðla og höfuðstafi, þá er ég nú mun færari í að yrkja stökur og kvæði upp á íslenska mátann en áður.

Ég þakka öllum þeim sem auðgað hafa anda minn með röfli sínu á Gestapó í gegnum tíðina, og vona innilega að ég hafi að minnsta kosti ekki rýrt anda þeirra með röfli mínu.

Lengi lifi Gestapó!

Ameríka

2006-04-03T13:59:00.000Z

Mér býðst að skreppa til Ameríku í sumar, nokkurn veginn hvenær sem ég vil. Ég myndi gista í Philadelphia, Pennsylvania (Bróðurást, Pennaskógi) í ágætum félagsskap.

Hvenær ætli sé best að fara?

Merkilegt

2006-04-01T18:33:00.000Z

Ég hef tekið eftir því að alltaf þegar einhver hamrar eða borar, þá tekur viðkomandi verk að minnsta kosti hálftíma. Svo virðist vera sem að enginn hamri nokkurn tímann eða bori bara einu sinni. Þetta eru aðgerðir sem þarf að framkvæma aftur, og aftur, og aftur ...

Refurþað

2006-03-30T10:55:00.000Z

PDF er frekar sniðugt skráasnið, en lesarinn fyrir það er einstaklega fyrirferðamikill og hægvirkur. Hver kannast ekki við það að ætla sér að opna PDF skrá í vefvafra, en hljóta að launum frost á öllu heila klabbinu á meðan lesarinn er að vinna úr fjárans skránni?

Á Slashdot um daginn rakst ég á lausn á vandanum. Lausnin heitir Foxit; einstaklega lítill og snotur lesari sem opnar PDF skrár á örskotsstundu. Honum fylgja þó tveir 'gallar':

- Notandinn verður sjálfur að tengja PDF skrár við Foxit handvirkt (gæti vafist fyrir tölvuviðvaningum)

- PDF skrár opnast ekki innan í vafranum með Foxit (minni háttar galli að mínu mati)

Þrátt fyrir þessa 'galla' mæli ég hiklaust með Foxit hverjum þeim sem er pirraður yfir PDF til handa.

Plötulaus

2006-03-28T13:35:00.000Z

Ég fór með númeraplöturnar af Benzinum gamla upp í Umferðareftirlit í dag. Hann er sumsé formlega tilvistarlaus, enda skiptir það svosem litlu máli þegar ekki er einu sinni hægt að keyra greyinu.

Þá er bara eftir að reyna að koma honum í verð. Ég tel mjög ólíklegt að nokkur vilji kaupa hann í óökuhæfu ástandi, en máski má selja partana úr honum.

Ef allt annað bregst get ég alltaf látið Vöku hirða hræið.

Nokkuð svalt

2006-03-26T19:13:00.000Z

You are most like Gandalf. You are very smart for your age, but don't get too proud. With that great brain of yours, you have a tendency to over-analyze stuff. Life isn't as difficult as you think it is. You have a great sense of responsibility to care for others, and that's good! Just make sure you don't neglect yourself in the process.

What LoTR Character Are You?

Rugl

2006-03-25T16:27:00.000Z

Ég var að lesa Fréttablaðið frá 19. mars áðan (ég les sjaldan blöð, og þegar það gerist eru það oftast gömul blöð). Í blaðinu er að finna viðtal við forsætisráðherra Íslands, þar sem hann tjáir sig um brotthvarf Kanana. Nánast allt sem hann segir þar er ömurlegt rugl og aumingjaskapur, en þetta vakti sérstaklega athygli mína:

Halldór neitar því að stuðningur Íslands við hernað Bandaríkjamanna í Írak hafi átt að liðka fyrir áframhaldandi veru herþotnanna á Keflavíkurflugvelli.

„Þetta blandaðist aldrei saman. Það hef ég aldrei nokkurn tíma sagt. Ég sagði hins vegar á sínum tíma að það er eðli samstarfs og vináttu að standa saman. Og við höfum í langflestum tilfellum staðið með Bandaríkjunum og Bretlandi í varnar- og öryggismálum, ekki síst vegna þess að þeir hafa verið okkar nánustu samstarfsmenn og staðið mjög vel við bakið á Íslendingum í þessum málum.“

Nokkur atriði varðandi þetta:

- Ég kaupi það ekki að stuðningur íslenskra stjórnvalda við Íraksstríðið, í óþökk rúmlega 80% íslensku þjóðarinnar, hafi ekki haft neitt með það að gera að sömu stjórnvöld vilja að Kanarnir hafi herlið hér. Ég held raunar að einungis vanviti myndi kaupa slíka þvælu.

- Jafnvel þó að svo ólíklega vildi til að forsætisráðherra fari hér með algjörlega rétt mál, þá er hin skýring hans á liðleskjuhættinum eiginlega ennþá meira rugl. Samkvæmt henni studdu hann og félagar hans innrásina í Írak vegna þess að Kanarnir og Tjallarnir eru vinir okkar Íslendinga. Þá vil ég spyrja hæstvirtan forsætisráðherra: „Ef Kanarnir og Tjallarnir myndu hoppa fram af Hallgrímskirkjuturni, myndir þú gera það líka?“

- Innrás í annað land að fyrra bragði fellur ekki undir „varnar- og öryggismál“. Slíkur umsnúningur á orðum á heima í skáldsögunni 1984, en ekki í veruleikanum.

Krunk

2006-03-23T21:12:00.000Z

Beinið í brotna fætinum hans Krumma er ekki gróið enn. Því miður er líklegt að það muni aldrei gera það. Dýralæknirinn ætlar að gefa þessu mánuð í viðbót, en eftir það fer fóturinn af.

Gáta

2006-03-22T16:14:00.000Z

Ég sá þessa sniðugu gátu hjá Skoffíni:

Renna skal uppáhalds vanmetnu kvikmyndinni sinni í gegnum Google Image Search og velja þaðan gott atriði úr myndinni. Þið, lesendurnir, eigið síðan að giska á hver myndin er. Ykkur er líka frjálst að gera hið sama á ykkar bloggum.

Kanar

2006-03-21T22:37:00.000Z

Djísús fokking kræst

Látum vera að 87% þeirra geta ekki fundið Írak á korti, 83% geta ekki fundið Afganistan, og 76% geta ekki fundið Sádi-Arabíu. Þetta kemur ekki mjög á óvart miðað við þekkingu mína á þekkingarleysi Kana á landafræði.

Það sem mér er mest umhugað að vita er hversu óendanlega fáfróð manneskja þarf að vera til að vera í hópi þeirra 11 prósenta sem geta ekki einu sinni fundið sitt eigið land á landakorti.

Fáfræði skuggalega margra Kana þekkir augljóslega nákvæmlega engin takmörk.

Fubar?

2006-03-21T18:49:00.000Z

Ég hef tekið þetta próf áður, fyrir meira en ári síðan, og fékk ég töluvert öðruvísi niðurstöður þá. Kannski þær fari eftir því hvernig manni líður þegar maður tekur prófið hverju sinni.

Disorder	Rating
Paranoid Disorder:	Low
Schizoid Disorder:	Very High
Schizotypal Disorder:	Moderate
Antisocial Disorder:	Low
Borderline Disorder:	Low
Histrionic Disorder:	Low
Narcissistic Disorder:	Moderate
Avoidant Disorder:	Moderate
Dependent Disorder:	Low
Obsessive-Compulsive Disorder:	Moderate
-- Personality Disorder Test - Take It! -- -- Personality Disorders --

Kóði

2006-03-21T00:17:00.000Z

Ég vek athygli á að ég hef sett inn kóðaðan texta á Gestapó. Ég geri mér fulla grein fyrir að meirihluti lesenda minna stundar Gestapó, en sumir þeirra gætu hafa misst af þessu, þar sem þetta er ekki þráður sem er uppfærður sérlega oft, og ég vil að sem flestir þeirra sem mögulega gætu haft áhuga á að leysa þrautina fái færi á því.

Breytingar

2006-03-20T17:23:00.000Z

Tímarnir breytast og tenglarnir með.

Aulinn er loksins kominn yfir á blogspot, og er það vel.

Önnur nýleg breyting er að Drottning viðmiðuninnar hefur breytt um nafn og tengil með. Hún er þó enn fullkomlega eðlileg, sem endranær.

Einnig færði Skoffín sig fyrir nokkru af hinu leiða folk.is og yfir á livejournal.com, sem er mér kunnugt frá því í gamla daga, og er hið ágætasta bloggkerfi.

Gvendur skrýtni er búinn að taka blogspotið úr urli sínu, en síðan hans er engu að síður keimlík hinni gömlu.

Aðrir hafa síðan bæst við undanfarið, en þær viðbætur ættu að vera augljósar fastagestum.